Psalms 72

ElikaSolomoni.

1Yiphe inkosi ukwahlulela kwakho, O Nkulunkulu, lokulunga kwakho indodana yesikhosini.

2Uzakwahlulela abantu bakho ngokulunga, labahluphekayo bakho ngemfanelo.

3Izintaba zizaletha ukuphumelela ebantwini, lamaqaqa azaletha izithelo zokulunga.

4Uzabavikela abahlukuluzwayo phakathi kwabantu asindise abantwana balabo abaswelayo afohloze umncindezeli.

5Uzaphila kokuphela njengelanga, njengenyanga kuzo zonke izizukulwane.

6Uzakuba njengezulu lisina phezu kotshani obugundiweyo, njengemikhizo ithelezela umhlabathi.

7Ngezinsuku zayo abalungileyo bazaphumelela; ukuphumelela kuzakwanda inyanga ize itshabalale.

8Uzabusa kusukela elwandle kusiya elwandle, njalo kusukela eMfuleni kusiya emikhawulweni yomhlaba.

9Izizwe ezihlala enkangala zizakhothama kuye, izitha zakhe zizakhotha uthuli.

10Amakhosi eThashishi lawemazweni akude azaletha imithelo kuye; amakhosi aseSheba leSebha azayilethela izipho.

11Wonke amakhosi azakhothama kuye lezizwe zonke zizakhonza kuye.

12Ngokuba uzabakhulula abaswelayo abakhalayo kuye, abahluphekayo abangelamsizi.

13Uzabahawukela ababuthakathaka labaswelayo asindise abaswelayo ekufeni.

14Uzabahlenga ekucindezelweni lekuhlukuluzweni, ngokuba igazi labo liligugu kuye.

15Mayibe lempilo ende! Mayiphiwe igolide laseSheba. Abantu mabayithandazele bayenzele izibusiso ilanga lonke.

16Akuthi amabele ande elizweni lonke; azunguze eziqongweni zamaqaqa. Izithelo zalo kazikhihlize njengeLebhanoni; kaligcwale njengotshani egangeni.

17Sengathi ibizo lakhe lingema njalo laphakade, kalibe khona lanini nxa lilokhu lisekhona ilanga. Zonke izizwe zizabusiswa ngaye, zizakuthi ubusisiwe.

18Udumo alube kuye uJehova uNkulunkulu, uNkulunkulu ka-Israyeli, onguye yedwa owenza izinto ezimangalisayo.

19Udumo kalube sebizweni lakhe elingcwele laphakade; sengathi umhlaba wonke ungagcwala inkazimulo yakhe. Ameni, njalo Ameni.

20Lokhu yikho ukuphetha kwemikhuleko kaDavida indodana kaJese.
Copyright information for NdeIBE